yahan jo kuchh hai husn-e-la-makan ke ma-siva kya hai
magar jalva hi jalva hai to mera aa.ina kya hai
tu hi shah-e-rag men rahta hai to hi mauj-e-nafas men hai
to phir batla ki ma-o-tu men itna fasla kya hai
masham-e-jan men kaisi ḳhushbuon ki aaj barish hai
chhupa.e apne daman men ḳhuda jaane saba kya hai
ham aise saḳht-janon ka bahut mushkil hai mar jaana
siva-e-zindagi ke aur koi rasta kya hai
na jaane jangalon men apne kaisi aag ugti hai
ujalon ka sar-e-kohsar jagmag silsila kya hai
yahi hairat hai kaise daur main jiina paḌa mujh ko
samajh men kuchh nahin aata bhala kya hai bura kya hai
‘shamim’ achchha kiya ki aap ne sab kuchh bhula Daala
magar rah rah ke dil men gunjti pichhli sada kya hai
Leave a Reply