yadgar-e-zamana hain ham log
sun rakho tum fasana hain ham log
ḳhalq se ho ga.e hain begane
shayad us ke yagana hain ham log
kyuun na har gul pe hoven zamzama-sanj
bulbul-e-ḳhush-tarana hain ham log
sab ke maḳhdum hain vale tere
ḳhadim-e-astana hain ham log
tir-e-mizhgan hai kya bala jis ke
jan-o-dil se nishana hain ham log
yaar aage nikal ga.e hain ka.i
pichhe un ke ravana hain ham log
apne ji men samajh tu zulf-e-daraz
qabil-e-taziyana hain ham log
‘muntazir’ shakl-e-bulbul-e-vahshi
Dushman-e-ashiyana hain ham log
Leave a Reply