yadash-ba-ḳhair hai vahi chehra ḳhayal men
sau jannaten javan hain goya ḳhayal men
kis shaan se sharik tiri anjuman men hain
baiThe hon jaise ham kahin tanha ḳhayal men
guzra hai ishq hi men ye aalam bhi muddaton
thi shaam zehn men na savera ḳhayal men
dekha tha ḳhvab men unhen nadim to kya kahen
kyuun ab tak aa raha hai pasina ḳhayal men
allah re ye maqam tire tishna-kam ka
sukhe paḌe hain saare hi dariya ḳhayal men
jugnu se yak-ba-yak jo faza men chamak uThe
ye kaun tha abhi abhi kya tha ḳhayal men
ai ‘dil’ ajab vo shahr-e-sitam tha ki aaj tak
hai koi adh-khula sa daricha ḳhayal men
Leave a Reply