Nazeer Qaisar
miTTi se kuchh ḳhvab ugane aaya huun
main dharti ka giit sunane aaya huun
tu ne dariyaon men diye baha.e hain
main bhi apne honT jalane aaya huun
tujh se mera rishta bahut purana hai
main duniya men tere bahane aaya huun
ab ke baar main tujh se milne nahin aaya
tujh ko apne saath le jaane aaya huun
chaar diye teri dahliz pe raushan hain
ek diya main aur jalane aaya huun
tu ne tegh se lahu ki buund gira.i thi
main dharti se phuul uThane aaya huun
Leave a Reply