yaad ka rog mat laga pyare
ahd-e-mazi ko bhuul ja pyare
ji bahalta nahin tasavvur se
tu kabhi samne bhi aa pyare
naam ke rah ga.e hain duniya men
dost ahbab aqraba pyare
ye bhi ik tarz-e-gham-gusari hai
tu mira hausla baḌha pyare
shisha-e-dil ko toḌne vaale
tu ne achchha nahin kiya pyare
jazba-e-shauq mar na jaa.e kahin
ehtiyatan hi ruuTh ja pyare
peḌ se gir ke zard patton ne
bhar diya farsh ka ḳhala pyare
tera gham bhi gham-e-zamana bhi
gham bhi ḳhalis nahin raha pyare
aas ke diip to jala ‘nusrat’
shaam ka vaqt ho chala pyare
Leave a Reply