Ya dar Mujhe Tera Hai Ki Main Kuchh Nahin Kahta

Asif Ud Daula

ya dar mujhe tera hai ki main kuchh nahin kahta

ya hausla mera hai ki main kuchh nahin kahta

hamrah raqibon ke tujhe baagh men sun kar

dil dene ka samra hai ki main kuchh nahin kahta

kahta hai bahut kuchh vo mujhe chupke hi chupke

zahir men ye kahta hai ki main kuchh nahin kahta

kahta hai tu kuchh ya nahin ‘asif’ se ye tu jaan

yaan kis ko sunata hai ki main kuchh nahin kahta