Tajdar Adil
vo zamana-saz bhi tha aur vafa-pesha bhi tha
main ne chaha hi nahin us shaḳhs ko samjha bhi tha
thi tamazat ishq ki itni ki vo vapas gaya
saath chalne ke liye kuchh duur tak aaya bhi tha
ye haqiqat hi sahi lekin use manega kaun
log pyase bhi rahe aur aankh men dariya bhi tha
is qadar chaha use jitna nahin chahe koi
ye mohabbat hi nahin us se mira badla bhi tha
ḳhud yaqin dil ko na tha is se juda hone talak
vo juda ho ja.ega is baat ko socha bhi tha
hijr ki shab men jo meri aankh se Dhalka nahin
vo sitara tha jo sub.h-e-vasl men chamka bhi tha
dasht-e-viran men kahin kuchh phuul bhi hain yaad ke
sirf chhaya hi nahin badal kabhi barsa bhi tha
is shanasa.i ka da.ava na-shanasi hi to hai
mujh ko dekha bhi tha jis ne aur jo chaunka bhi tha
ab main lab-basta huun ‘adil’ to faqat is vaste
sirf samjha hi nahin us shaḳhs ko chaha bhi tha
Leave a Reply