Asghar Gondvi
samne un ke taḌap kar is tarah fariyad ki
main ne puuri shakl dikhla di dil-e-nashad ki
ab yahi hai vaj.h-e-taskin ḳhatir-e-nashad ki
zindagi main ne dayar-e-husn men barbad ki
hosh par bijli giri ankhen bhi ḳhira ho ga.iin
tum to kya the ik jhalak si thi tumhari yaad ki
chal diya majnun to sahra se kisi janib magar
ik sada gunji hui hai naala o fariyad ki
naghma-e-pur-dard chheḌa main ne is andaz se
ḳhud-ba-ḳhud mujh par nazar paḌne lagi sayyad ki
dil hua majbur jis dam ashk-e-hasrat ban gaya
ruuh jab taḌpi to surat ban ga.i fariyad ki
is harim-e-quds men kya lafz o ma.ani ka guzar
phir bhi sab baten pahunchti hain lab-e-fariyad ki
tamtama uThe vo aariz mere arz-e-shauq par
husn jaag uTha vahin jab ishq ne fariyad ki
ashiyan men ab kisi surat nahin paḌta hai chain
thi nazar tasir men Duubi hui sayyad ki
sher men rangini-e-josh-e-taḳhayyul chahiye
mujh ko ‘asghar’ kam hai aadat naala o fariyad ki
Leave a Reply