Salahuddin Nayyar
kitne hasin ḳhvab haqiqat-pasand hain
kitne tasavvurat nigahon men band hain
apni nazar se koi hamen kya gira.ega
ham ahl-e-dard apni nazar men buland hain
kuchh to bata.iye sabab-e-dil-giraftagi
bazm-e-vafa men aaj bhi ham jaise chand hain
kitni kasha-kashon se raha sabiqa magar
apni ravish pe aaj bhi ham kar-band hain
arbab-e-ishq ko bhi hai divangi pe naaz
hone do ahl-e-husn agar aql-mand hain
hai aaj bazm-e-shauq men ḳhushbu basi hui
phulon se kis ke gundhe hue bazu-band hain
‘nayyar’ bayan-e-dard se kuchh fa.eda nahin
ye ahl-e-bazm itne kahan dard-mand hain
Leave a Reply