Wo Sath Aaya to Meri uDan baiTh Gai

Nusrat Mehdi

vo saath aaya to meri uḌaan baiTh ga.i

na jaane kya hua mujh men thakan baiTh ga.i

phir is ke baad parinde zamin pe girne lage

kisi ki aah sar-e-asman baiTh ga.i

qarib tha ki ta.alluq bahal ho jaata

ajab ḳhamoshi magar darmiyan baiTh ga.i

haveli chhoḌ ke sab log chal diye lekin

har ek hujre men ik dastan baiTh ga.i

bulandiyon pe pahunch kar main ḳhush bahut thi magar

zamin ki samt jo dekha to jaan baiTh ga.i

zaban-darazon se ‘nusrat’ kahan talak laḌti

so dil pe sabr ki rakh kar chaTan baiTh ga.i