Karamat Ali Karamat
vo sach ke chehre pe aisa naqab chhoḌ gaya
ruḳh-e-hayat pe jaise azaab chhoḌ gaya
natija koshish-e-paiham ka yuun hua ulTa
main asman pe mauj-e-sarab chhoḌ gaya
vo kaun tha jo miri zindagi ke daftar se
huruf le gaya ḳhali kitab chhoḌ gaya
bahar ban ke vo aaya gaya bhi shaan ke saath
ki zard patton pe rang-e-gulab chhoḌ gaya
mire lahu men jo aaya tha mehman ban kar
miri ragon men vo ik aftab chhoḌ gaya
gaya to saath vo leta gaya har ik naghma
ḳhala ki god men TuuTa rubab chhoḌ gaya
mila na jazba-e-tashkik ko libas koi
vo har saval ka aisa javab chhoḌ gaya
bikherta hai ‘karamat’ jo dard ki kirnen
vo ḳhvab zehn men ik mahtab chhoḌ gaya
Leave a Reply