vo musalsal chup hai tere samne tanha.i men
sochta kya hai utar ja baat ki gahra.i men
surḳh-ru hone na paaya tha ki piila paḌ gaya
chand ka bhi haath tha jazbat ki paspa.i men
be-libasi hi na ban jaa.e kahin tera libas
a.ine ke samne pagal na ho tanha.i men
tu agar phal hai to ḳhud hi TuuT kar daman men aa
main na phekunga koi patthar tiri angna.i men
rat-bhar vo apne bistar par paḌa rota raha
duur ik avaz banjar ho ga.i shahna.i men
da.ere baḌhte ga.e parkar ka munh khul gaya
vo bhi daḳhil ho gaya ab sarhad-e-rusva.i men
habs to dil men tha lekin aankh tap kar rah ga.i
raat saara shahr Duuba dard ki purva.i men
aankh tak bhi ab jhapakne ki mujhe fursat nahin
naqsh hai divar par tasvir hai bina.i men
log vapas ho ga.e ‘sajid’ numa.ish gaah se
aur main khoya raha ik mahshar-e-ra.ana.i men
Leave a Reply