Kabir Ajmal
vo mauj-e-hava jo abhi bahne ki nahin hai
ham jante hain aap se kahne ki nahin hai
yuun ḳhush na ho ai shahr-e-nigaran ke dar o baam
ye vadi-e-saffak bhi rahne ki nahin hai
ai kaash koi koh-e-nida hi se pukare
divar-e-sukut aap hi Dhahne ki nahin hai
kyuun aks-e-gurezan se chamak bujh ga.i dil ki
ye raat to mahtab ke gahne ki nahin hai
raqqasa-e-sahra-e-junun bhi hai yahi mauj
yak chashma-e-ḳhun-nab se bahne ki nahin hai
ik tarfa tamasha hai mujhe shoḳhi-e-guftar
ashuftagi-e-‘mir’ bhi sahne ki nahin hai
Leave a Reply