Zaheer Kashmiri
vo mahfilen vo misr ke bazar kya hue
ai shahr-e-dil tire dar-o-divar kya hue
Dasne lagi hain ham ko zamane ki raunaqen
ham jurm-e-ashiqi ke saza-var kya hue
itni gurez-pa to na thi umr-e-dosti
ai ḳhanda-e-ḳhafi tire iqrar kya hue
phulon ne baḌh ke paanv men zanjir Daal di
varaftagi men ma.il-e-gulzar kya hue
jin ka jamal jannat-e-qalb-o-nazar raha
vo ham-nashin vo yar-e-tarah-dar kya hue
ham is tarah to yusuf-e-be-karvan na the
ai dil tu hi bata tire gham-ḳhvar kya hue
ummid-e-vasl-e-yar men shab kaaT di to kya
din Dhal gaya to niind se bedar kya hue
aane se un ke Dubti nabzen sambhal ga.iin
asan marhale mire dushvar kya hue
Leave a Reply