Muztar Khairabadi
apne ahd-e-vafa ko bhuul ga.e
tum to bilkul ḳhuda ko bhuul ga.e
kuchh na puchh intiha-e-ranj-e-firaq
dard pa kar dava ko bhuul ga.e
ham ne yad-e-butan men dam toḌa
marte marte ḳhuda ko bhuul ga.e
un ki baton ko yaad karta huun
jo miri iltija ko bhuul ga.e
darmiyani ta.alluqat na puchh
ibtida intiha ko bhuul ga.e
un se do din bhi chaah nibh na saki
‘muztar’-e-be-nava ko bhuul ga.e
Leave a Reply