afroz-rizvi

Wo Mahakta Hai Jo Khushbu Ke Hawalon Ki Tarah

vo mahakta hai jo khushbu ke havalon ki tarah

is ko rakkha hai kitabon men gulabon ki tarah

vo jo khvabon ke jazire men nazar aata hai

mere idrak men rahta hai kinaron ki tarah

ban ke ehsas jo dhadkan se lipat jaata hai

saath rahta hai mohabbat men khayalon ki tarah

dekhna khvab ki surat men nazar aaega

vo jo palkon pe chamakta hai sitaron ki tarah

main ne khushbu ke libade men jise chuma tha

meri har saans men shamil hai vo phulon ki tarah

vo mire sher ka ik misra-e-tar ho jaise

gungunati huun use aaj main giton ki tarah

itni achchhi thi mulaqat ki pahle din hi

dil men ‘afroz’ basaya use sochon ki tarah

More Poems

Leave a Comment