Wo Kaun Dil Hai Jahan Jalwa-Gar Wo Nur Nahin

vo kaun dil hai jahan jalva-gar vo nuur nahin

is aftab ka kis zarre men zuhur nahin

koi shitab khabar lo ki be-namak hai bahar

chaman ke beach divanon ka ab ke shor nahin

tajalliyon se pahunchta hai kab use aaseb

sanam-kada hai na akhir ye koh-e-tur nahin

tire safar ki khabar sun ke jaan dhadkon se

jo pahunchun marg ke nazdik main to duur nahin

koi bhi deta hai ladkon ke haath shisha-e-dil

‘yaqin’ main ghaur se dekha to kuchh shuur nahin

Leave a Comment