vo kahte hain aao miri anjuman men magar main vahan ab nahin jaane vaala
ki aksar bulaya bula kar biThaya biTha kar uThaya uTha kar nikala
nashat-o-alam ke safed-o-siyah ne hamari nigahon ko hairat men Daala
idhar raushni hai udhar tirgi hai kahin hai andhera kahin hai ujala
mira dard puchha mira haal dekha mire dil ka arman tum ne nikala
ḳhuda aur bhi de zyada maratib siva aur is se bhi ho bol-bala
paḌi niiv aapas men go dosti ki magar dosti kis tarah nibh sakegi
use hai nazakat mujhe hai naqahat na vo aane vaala na main jaane vaala
shivale ki janib qadam kyuun baḌha.un nazar kis liye su-e-masjid uTha.un
idhar kah raha hai udhar sun raha hai koi kahne vaala koi sunne vaala
hamin par huiin kya hazaron jafa.en hazaron par aa.iin hazaron bala.en
zamane men koi sambhalne na paaya kisi shoḳh ne hosh jab se sambhala
vo aa.e the pahlu men behosh tha main hui hogi dil par bahut kuchh navazish
magar kya ḳhabar mujh ko allah jaane tamanna nikali ki kanTa nikala
hazaron bala-nosh idhar bhi udhar bhi mili itni fursat kahan mai-kade men
raha kaam piine pilane se sab ko na dhoi surahi na saghar khangala
mohabbat ke jogi sitam ke birogi vafa ke bhikari jafa ke pujari
jahan dekh paate hain jalva buton ka bichhate hain apna vahin mirg-chhala
chura le gaya koi dil bhi jigar bhi uḌa le gaya koi sabr-o-sukun bhi
yaqin hai tamanna nikalte nikalte nikal ja.ega ashiqon ka divala
vatan se nikal kar akele chale the magar ḳhush-yaqini ke qurban jaa.en
mila dasht-e-ghurbat men ik ik qadam par hamen ik na ik jan-pahchan vaala
fughan ki bhi imdad hasil karun main mohabbat ko bhi kuchh tavajjoh dila.un
bharam jazb-e-dil ka nikalne na paa.e nikal aa.e parde se vo parde vaala
ghazab Dha ga.iin sidhi-sadi ada.en sitam kar ga.iin tirchhi banki nigahen
yahi shor uTTha jidhar se vo guzre mujhe maar Daala mujhe maar Daala
idhar tuur par ghash men muusa paḌe hain udhar hatif-e-ghaib ye kah raha hai
zara kholiye aap ankhen to apni qarib aa gaya dekhiye duur vaala
ye matlab tha arman us ke na niklen jo taḌpen to kuchh aur pechidgi ho
mire ḳhana-e-dil men ranj-o-alam ne tana har taraf ḳhuub makḌi ka jaala
tumhara sana-ḳhvan tumhara dua-go tumhara fida.i tumhara salami
ye kya kah diya us ne vaqif nahin ham vahi haan vahi ‘nuh’ tufan vaala
Leave a Reply