poet

Wo Jhuta Ishq Hai Jis Mein Fughan Ho

vo jhuta ishq hai jis men fughan ho

vo kachchi aag hai jis men dhuan ho

adu tum se tum un se bad-guman ho

tumhare vo tum un ke pasban ho

bhala tum aur mujh par mehrban ho

inayat ye nasib-e-dushmanan ho

mira haal aur phir mera bayan ho

ajab kya gar adu bhi ham-zaban ho

kahen kis se khudi men tum kahan ho

gila jab ho ki qaabu men zaban ho

tumhari be-rukhi shikve hamare

qayamat tak na puuri dastan ho

zaban bahki hui hairan nigahen

khayal-e-dil kahan hai tum kahan ho

maza jab aae un se guftugu ka

payami ka dahan meri zaban ho

kashida kyuun na ho bazar-e-yusuf

ki jab tum sa mata-e-karvan ho

kahun kya raz-e-dil kyuun kar ho bavar

ki tum sa hi tumhara raz-dan ho

abhi se kis liye dil chhod baithen

jahan tak ho sake ah-o-fughan ho

More Poems

Leave a Comment