Wo Hi Andaz-E-Dilbari Hai Abhi

vo hī andāz-e-dilbarī hai abhī

us keī bātoñ meñ dilkashī hai abhī

kashti-e-dil bahak na jaa.e kahīñ

mauj-dar-mauj gum rahī hai abhī

kisī tūfān kā ishāra hai

ye jo saffāk ḳhāmushī hai abhī

raakh se ab bhī uTh rahā hai dhuāñ

yād-e-māzī sulag rahī hai abhī

ishq meñ sab to had se paar hue

par hameñ ehtiyāt sī hai abhī

ahd-o-paimāñ kareñge fursat se

koī jaldī nahīñ paḌī hai abhī

kyā mohabbat hī keī alāmat hai

us keī palkoñ meñ jo namī hai abhī

Leave a Comment