abbas-tabish

Wo Hansti Hai To Uske Hath Rote Hain

kisi ke baad

apne hathon ki bad-surati men kho gai hai vo

mujhe kahti hai ‘tabish’! tum ne dekha mere hathon ko

bure hain naan?

agar ye khubsurat the to in men koi bosa kyuun nahin thahra”

ajab ladki hai

puure jism se kat kar faqat hathon men zinda hai

surahi-dar gardan narm honton tez nazron se vo bad-zan hai

ki in apnon ne hi us ko sar-e-bazar phenka tha

kabhi ankhon men Duubi

aur kabhi bistar pe silvat ki tarah ubhri

ajab ladki hai

khud ko DhunDti hai

apne hathon ki lakiron men

jahan vo thi na hai, ainda bhi shayad nahin hogi

vo jab ungli ghuma kar

‘faiz’ ki nazmen sunati hai

to is ke haath se puure badan ka dukh jhalakta hai

vo hansti hai to us ke haath rote hain

ajab ladki hai

puure jism se kat kar faqat hathon men zinda hai

mujhe kahti hai ”’tabish’! tum ne dekha mere hathon ko

bure hain nan”?

main shayad gir chuka huun apni nazron se

main chhupna chahta huun us ke thaile men

jahan cigarette hain machis hai

jo us ka haal maazi aur mustaqbil!

ajab ladki hai

aae to khushi ki tarah aati hai

use mujh se mohabbat hai

ki shayad mujh men bhi bad-surati hai us ke hathon kii!

More Poems

Leave a Comment