Ghar Ke Bahar Bhi to Jhanka Ja Sakta Hai

ghar ke bāhar bhī to jhāñkā jā saktā hai

aur kisī kā rasta dekhā jā saktā hai

raat guzārī jā saktī hai taare gin kar

din meñ chādar taan ke soyā jā saktā hai

shikve duur kiye jā sakte haiñ yāroñ se

is sunday ko phone ghumāyā jā saktā hai

us ke jaisā hī ab kuchh hāsil hai mujh ko

ab us kī ḳhvāhish ko chhoḌā jā saktā hai

vaise paisa hī sab kuchh hai is duniyā meñ

lekin paise par bhī thūkā jā saktā hai

va.ada karne meñ kaisī ghabrāhaT pyāre

va.ade se ik pal meñ palTā jā saktā hai

mere an-dekhī karne kā hai kyā kāran

kam se kam us se pūchhā jā saktā hai

maiñ apne chehre se thoḌā uub gayā huuñ

kyā apnā chehra bhī badlā jā saktā hai

sher kahe jā sakte haiñ paripāTī vaale

aur zamīnoñ par bhī sochā jā saktā hai

dhīre dhīre zālim kī jaḌ khodo ‘saurabh’

rassī se chaTTān ko kaaTā jā saktā hai

Leave a Comment