Aariz-E-Shama Pe Nind Aa Gai Parwanon Ko

āriz-e-sham.a pe niiñd aa ga.ī parvānoñ ko

ḳhvāb se ab na jagā.e koī dīvānoñ ko

un ko ma.alūm hai rindoñ kī tamannā kyā hai

aks-e-ruḳh Daal ke bhar dete haiñ paimānoñ ko

ai dil-e-zār udhar chal ye tazabzub kyā hai

vo to āñkhoñ pe uThā lete haiñ mehmānoñ ko

vo bhī mutlāshī-e-yak-jalva-e-gum-gashta haiñ

ham ne nazdīk se dekhā hai parī-ḳhānoñ ko

ho ga.e saaf ayaañ rūh-o-badan ke nāsūr

raushnī maar ga.ī aaj ke insānoñ ko

un ke har chaak se tanvīr-e-vafā phūTegī

jashn-e-fardā meñ sajā.eñge garebānoñ ko

qalam-e-dār se tahrīr-e-rasan se ham ne

ik nayā moḌ diyā ishq ke afsānoñ ko

josh dariyā ke qarā.in ye batāte haiñ ‘zahīr’

mauj khā jā.egī sāhil ke shabistānoñ ko

Leave a Comment