Zaheer Kashmiri
ariz-e-sham.a pe niind aa ga.i parvanon ko
ḳhvab se ab na jaga.e koi divanon ko
un ko ma.alum hai rindon ki tamanna kya hai
aks-e-ruḳh Daal ke bhar dete hain paimanon ko
ai dil-e-zar udhar chal ye tazabzub kya hai
vo to ankhon pe uTha lete hain mehmanon ko
vo bhi mutlashi-e-yak-jalva-e-gum-gashta hain
ham ne nazdik se dekha hai pari-ḳhanon ko
ho ga.e saaf ayaan ruh-o-badan ke nasur
raushni maar ga.i aaj ke insanon ko
un ke har chaak se tanvir-e-vafa phuTegi
jashn-e-farda men saja.enge garebanon ko
qalam-e-dar se tahrir-e-rasan se ham ne
ik naya moḌ diya ishq ke afsanon ko
josh dariya ke qara.in ye batate hain ‘zahir’
mauj kha ja.egi sahil ke shabistanon ko
Leave a Reply