vo hamen raah men mil jaaen zaruri to nahin
khud-ba-khud fasle mit jaaen zaruri to nahin
chand chehre ki hain gum vaqt ke sannate men
ham magar un ko bhula paaen zaruri to nahin
jin se bichhde the to tarik thi duniya saari
ham unhen dhund ke phir laaen zaruri to nahin
tishnagi had se siva aur safar jaari hai
par sarabon se bahal jaaen zaruri to nahin
zindagi tu ne to sach hai ki vafa ham se na ki
ham magar khud tujhe thukraen zaruri to nahin
ju-e-ehsas men larzan ye gurezan lamhat
naghma-e-dard men dhal jaaen zaruri to nahin
ye to sach hai ki hai ik umr se bas ek talash
ham magar apna pata paaen zaruri to nahin
Leave a Reply