vo baagh men mera muntazir tha
aur chand tulua ho raha tha
zulf-e-shab-e-vasl khul rahi thi
khushbu sanson men ghul rahi thi
aai thi main apne pi se milne
jaise koi gul hava se khilne
ik umr ke baad main hansi thi
khud par kitni tavajjoh di thii!
pahna gahra basanti joda
aur itr-e-suhag men basaya
aine men khud ko phir kai baar
us ki nazron se main ne dekha
sandal se chamak raha tha matha
chandan se badan mahak raha tha
honton pe bahut sharir laali
galon pe gulal khelta tha
balon men piroe itne moti
taron ka guman ho raha tha
afshan ki lakir maang men thi
kajal ankhon men hans raha tha
kanon men machal rahi thi baali
banhon se lipat raha tha gajra
aur saare badan se phutta tha
us ke liye giit jo likha thaa!
hathon men liye diye ki thali
us ke qadmon men ja ke baithi
aai thi ki aarti utarun
saare jivan ko daan kar duun!
dekha mire devta ne mujh ko
baad is ke zara sa muskuraya
phir mere sunahre thaal par haath
rakkha bhi to ik diya uthaya
aur meri tamam zindagi se
mangi bhi to ek shaam mangi
Leave a Reply