vo bad-e-garm tha bad-e-saba ke hote hue
main zaḳhm zaḳhm tha barg-e-hina ke hote hue
bas ek manzar-e-ḳhali tha meri ankhon men
nigar-e-ḳhana-e-rang-e-hina ke hote hue
vo taq-e-dil ho ki mehrab-e-mimbar-e-maqtal
charagh sab ne jala.e hava ke hote hue
ajiib log the ḳhamosh rah ke jiite the
dilon men hurmat-e-sang-e-sada ke hote hue
vo ek vasl ki shab bhi malal men guzri
girah-e-kusha.i-e-band-e-qaba ke hote hue
vo lauT aa.e the ranj-e-safar ke imkan se
rafiq-e-rah ki avaz-e-pa ke hote hue
na kam hua tha gunahon se raghbaton ka junun
hazar sohbat-e-sidq-o-safa ke hote hue
Leave a Reply