Abul Hasanat Haqqi
vo ab numaish-e-sair-o-safar se bahar hai
ye mere saath magar rahguzar se bahar hai
vahi muqim hai jo apne ghar se bahar hai
ki jitna saaya hai saara shajar se bahar hai
mire khuda ye tab-o-tab-e-saf.ha kaisi hai
jo likh raha huun vo kilk-e-hunar se bahar hai
zamir-e-khak ko ab zahar hi likho yaani
ilaaj us ka kaf-e-chara-gar se bahar hai
chalo namaz padhen aur qarib le aaen
shajar dua ka hamari sahar se bahar hai
asiir hai miri khinchi hui lakiron ka
ye vahm hai ki vo mere asar se bahar hai
ye ijz hai ki qanaat hai kuchh nahin khulta
bahut dinon se vo khair-o-khabar se bahar hai
na jaane kya hai kisi chaak par thaharti nahin
hamari khaak gil-e-kuza-gar se bahar hai
Leave a Reply