Tariq Qamar
kaise rishton ko sameTen ye bikharte hue log
TuuT jaate hain yahi faisla karte hue log
ghaur se dekho hamen, dekh ke ibrat hogi
aise hote hain bulandi se utarte hue log
ai ḳhuda ma.arka-e-lashkar-e-shab baaqi hai
aur mire saath hain parchha.in se Darte hue log
mar ke dekhenge kabhi ham bhii, suna hai ham ne
muskurate hain tiri raah men marte hue log
qaid-ḳhanon ke andheron men baḌe chain se hain
apne andar ke ujalon se guzarte hue log
kitne chehron pe sar-e-bazm karenge tanqid
aa.ina dekh ke tanha.i men Darte hue log
ḳhud-kushi karne pe amada o majbur hain ab
zindagi! ye hain tire ishq men marte hue log
tum to be-vaj.h pareshan hue ho ‘tariq’
yunhi pesh aate hain va.adon se mukarte hue log
Leave a Reply