Wo Aankh De Qarib Ka Saya Dikhai De

vo aañkh de qarīb kā saaya dikhā.ī de

āvāz raushnī kī kahīñ to sunā.ī de

jis naam ko jiyā hai baḌe e’timād se

us ko bhī zindagī se kabhī āshnā.ī de

aisā huā to jiine na deñge kisī ko log

insāñ ke haath meñ na mire rab ḳhudā.ī de

maiñ jāntī huuñ paañv rakhe haiñ mire kahāñ

ḳhud se karūñ savāl koī jab baḌā.ī de

kab tak maiñ lamha lamha jiyūñ ḳhud ko bhuul kar

is umr-qaid se mire dil ko rihā.ī de

patthar samajh ke jis ne kiyā dil ko be-asās

us ko bhī āñsuoñ kī namī tak rasā.ī de

aisā na ho ki thak ke yaqīñ chuur chuur ho

itnī tavīl ab na diloñ ko judā.ī de

tārīkiyoñ ko rakh ke kahīñ khanDarāt meñ

jo log pārsā haiñ unheñ pārsā.ī de

‘ūshā’ jo haath rakhte nahīñ mire aks par

in ā.inoñ ko kuchh to ġham-e-ḳhud-numā.ī de

Leave a Comment