vo aankh de qarib ka saaya dikha.i de
avaz raushni ki kahin to suna.i de
jis naam ko jiya hai baḌe e’timad se
us ko bhi zindagi se kabhi ashna.i de
aisa hua to jiine na denge kisi ko log
insan ke haath men na mire rab ḳhuda.i de
main janti huun paanv rakhe hain mire kahan
ḳhud se karun saval koi jab baḌa.i de
kab tak main lamha lamha jiyun ḳhud ko bhuul kar
is umr-qaid se mire dil ko riha.i de
patthar samajh ke jis ne kiya dil ko be-asas
us ko bhi ansuon ki nami tak rasa.i de
aisa na ho ki thak ke yaqin chuur chuur ho
itni tavil ab na dilon ko juda.i de
tarikiyon ko rakh ke kahin khanDarat men
jo log parsa hain unhen parsa.i de
‘usha’ jo haath rakhte nahin mire aks par
in a.inon ko kuchh to gham-e-ḳhud-numa.i de
Leave a Reply