vasl ki ummid baḌhte baḌhte thak kar rah ga.i
sub.h-e-kazib aur kya karti chamak kar rah ga.i
dil shab-e-gham kaaT laaya dam hua lekin hava
ik kali thi jo sahar hote mahak kar rah ga.i
na-shanas-e-ru-e-ḳhush-hali hai tab-e-gham-nasib
jab masarrat samne aa.i jhijak kar rah ga.i
mujh ko jalne de abhi ai maut kyuun duniya kahe
aag kaisi thi jo siine men bhaḌak kar rah ga.i
koi kya dekhe bahar-e-ru-e-qatil bad-e-zab.h
kyuun khule vo aankh jo hasrat se tak kar rah ga.i
mere dil ke zaḳhm aur un ki shamatat dekhiye
hans diye kisht-e-tamanna jab lahak kar rah ga.i
kya tamanna thi ye betabi jise rukna paḌa
tang tha sehan-e-qafas bulbul phaḌak kar rah ga.i
log kahte hain khula tha raat bhar bab-e-qubul
kis taraf meri dua ‘saqib’ bhaTak kar rah ga.i
Leave a Reply