Shahid Jameel
vaqt sab ḳharch mira gham ko khapane men hua
kaam ik pal ka tha par ek zamane men hua
is guzargah pe chalne ki ḳhushi aur hi thi
gham tha vo aur jo manzil ke na aane men hua
mahv tha kaun se mehvar pe ta.alluq ka tilism
vaqi.a mera tha zikr us ke fasane men hua
dil ki jo saakh thi jazbat ke ḳhitte men rahi
dard mash.hur magar saare zamane men hua
rang ka raag alag naqsh ki avaz alag
ra.egan ḳhuun bahut ḳhaak uḌane men hua
aḳhirash aan ke gum ho gaya mujh men hi raqib
tiir ka qissa tamam us ke nishane men hua
Leave a Reply