vaqa.i koi agar maujud hai
phir to ye dukh umr-bhar maujud hai
biich ka rasta nahin baaqi koi
ya ḳhuda hai ya bashar maujud hai
us ko paane ki tavaqqo hai bahut
jab talak ye chashm-e-tar maujud hai
us ke milne hi se pahle jaane kyuun
us ko kho dene ka Dar maujud hai
koi manzil kaise tanha sar karen
ham-safar men ham-safar maujud hai
adat-e-ḳhana-ḳharabi hai ‘jamal’
varna achchha-ḳhasa ghar maujud hai
Leave a Reply