Wan Jo Kuchh Kabe Mein Asrar Hai Allah Allah

Poet

vaan jo kuchh ka.abe men asrar hai allah allah

so mire but men numudar hai allah allah

dair men ka.abe men maiḳhane men aur masjid men

jalva-gar sab men mira yaar hai allah allah

us ke har naqsh-e-qadam par karen ashiq sajda

but-e-kafir ki vo raftar hai allah allah

husn ke us ki kiya tur-e-tajalli dil ko

haa.e kya jalva-e-didar hai allah allah

na gharaz kufr se na diin se ham ko matlab

yaar se apne sarokar hai allah allah

shaiḳh hai tujh ko hi inkar sanam mere se

varna har shaḳhs ko iqrar hai allah allah

ḳhauf kya daghdagha-e-hashr se hai mujh ko ‘muhib’

pir-e-man haidar-e-karrar hai allah allah