Jahanzeb Sahir
vaise to kam hi miyan ahl-e-junun rote hain
dekhne vaale samajhte hain ki ḳhuun rote hain
puchhne vaale ba-zid hain ki bataya jaa.e
rone valon ko nahin yaad ki kyuun rote hain
mujh se mat puchh ki tafriq nahin kar sakta
main to hanste hue logon ko kahun rote hain
vo bahut ḳhush hai naya ghar hai naya shahr magar
gaanv men us ki haveli ke sutun rote hain
tum ko ham jaise magar ḳhush hi nazar a.enge
ye jo ham jaise hain ankhon ke darun rote hain
us ki ankhon ko kahan aata tha rona ‘sahir’
main ne phir ro ke dikhaya tha ki yuun rote hain
Leave a Reply