vahshaton ko bhi ab kamal kahan
ab junun kar-e-be-misal kahan
khud se bhi mangti nahin khud ko
tujh se phir khvahish-e-saval kahan
mere ham-rang pairahan pahne
shaam aisi shikasta-hal kahan
subh ki bhiid men kahun kis se
ho gai raat paemal kahan
meri sab halaton ko jaan sake
koi aisa sharik-e-hal kahan
tere khvabon ke baad ankhon men
ho sake raushni bahal kahan
be-irada jo bakhsh di tu ne
is khushi ka tujhe khayal kahan
dhundte dhundte main thak bhi gai
kho gae mere mah-o-sal kahan