Wafa Ke Jurm Mein Aksar Pukare Jate Hain

vafā ke jurm meñ aksar pukāre jaate haiñ

ham ahl-e-ishq mohabbat meñ maare jaate haiñ

hamārī laash to girtī hai jañg laḌte hue

magar jo piiTh pe barchhe utāre jaate haiñ

amāma sajtā hai āḳhir amīr-e-shahr ke sar

hamāre jaise aqīdat meñ vaare jaate haiñ

maiñ rok saktā nahīñ ḳhaak ko bikharne se

samundaroñ kī taraf chal ke dhāre jaate haiñ

bhale ho kār-e-mohabbat yā kār-e-duniyā ‘zubair’

hamāre saath hamesha ḳhasāre jaate haiñ

Leave a Comment