duniya pe mere fan ka asar baad men hua
pahle to aib tha ye hunar baad men hua
barson sarab ban ke miri aankh men raha
ik shaḳhs vo jo dida-e-tar baad men hua
sohbat men meri tha to kushada thi us ki fikr
vo tang-zehn tang-nazar baad men hua
ik sher raat zehn ke kaghaz pe niind men
hone se rah gaya tha magar baad men hua
kuche se us ne mujh ko nikala to shor kyon
aadam bhi to bahisht-badar baad men hua
kahte hain log us ki to fitrat thi dhuup ki
vo shaḳhs chalta phirta shajar baad men hua
ham ḳhanqah-e-ishq ke pahle murid hain
majnun ka to idhar se guzar baad men hua
‘dilbar’ ne baar baar ujaḌa hai luuT kar
abad apne dil ka nagar baad men hua
Leave a Reply