va.ada raha na yaad mire mast-e-ḳhvab ko
ab kya javab duun dil-e-pur-iztirab ko
zeba ghurur-o-naz tha tere shabab ko
Thukra diya mire dil-e-ḳhana-ḳharab ko
chamke jo dagh-e-dil mire roz-e-siyah men
taare dikha.i dene lage aftab ko
maidan-e-hashr men na qayamat bapa ho aur
main dil sanbhalun aap sanbhalen naqab ko
lakhon men chun liya tumhen roz-e-shumar bhi
dekho zara miri nigah-e-intiḳhab ko
bhar aa.i aankh jab kabhi yaad aa ga.i vo raat
bhula na aaj tak main javani ke ḳhvab ko
‘safdar’ kahan main aur kahan hazrat-e-riyaz
nisbat magar charagh se hai aftab ko
Leave a Reply