Poet
visal-e-yar tamanna-e-ḳham hai shayad
ye daur-e-hijr abhi na-tamam hai shayad
jabin-e-ishq ne jaan pahli baar sajda kiya
tira nishan-e-qadam vo maqam hai shayad
main jis kitab ko har shaam ro ke paḌhta huun
mire sanam ki zaban ka kalam hai shayad
tamam zer zabar pesh aur harfon ka
bara-e-soz-o-alam ehtimam hai shayad
bujha saka na main ashkon se dil ki atish ko
mira fughan fughanon men ḳhaam hai shayad
miri nigah men jiina sharaf se marna hai
tiri nigah men ye sab haram hai shayad
main aaj phir usi miTTi pe sajda-rez hua
mire ghurur ka ye iḳhtitam hai shayad
tumhare ishq ki rudad sun ke lagta hai
tire sanam ka bhi ‘naqqash’ naam hai shayad
Leave a Reply