ye ujala har ik shai ko chamka gaya
aa.ina dil ka kuchh aur dhundla gaya
aaj maghmum hai vo sar-e-a.ina
zulf uljhi to mera ḳhayal aa gaya
apni barbadiyon ka mujhe gham nahin
gham ye hai kis tarah tujh se dekha gaya
itni fursat kahan thi ki ham sochte
ishq men kya huaa, kya mila, kya gaya
luT gaya johd-e-hasti men ehsas bhi
zindagi ke liye haa.e kya kya gaya
jis ke honTon ke daman men kuchh bhi na tha
jab uTha bazm se giit barsa gaya
Leave a Reply