utre tilism shab ke ujalon pe rat-bhar
qurban hui hai sub.h charaghon pe rat-bhar
zulmat men apni Duub ga.iin din ki bastiyan
suraj tamam chamke sitaron pe rat-bhar
utre nahin shabon men uḌanon ke hausle
baiThe rahe parind bhi shaḳhon pe rat-bhar
ik lau nahin nasib ghariban-e-shahr ko
sham.en jali hain kitni mazaron pe rat-bhar
Dhalti rahi nigah men chehron ki chandni
nazil hue yaqin gumanon pe rat-bhar
pairahan-e-jamal hai raḳht-e-barahnagi
pahne ga.e hain jism libason pe rat-bhar
ḳhushbu men jazb ho ga.iin mahtabiyan ‘samad’
shabnam hui nisar gulabon pe rat-bhar
Leave a Reply