us ko takte bhi nahin the pahle
ham bhi ḳhuddar the kitne pahle
us ko dekha to ye mahsus hua
ham bahut duur the ḳhud se pahle
dil nazar aate hain ab ankhon men
kitne gahre the ye chashme pahle
kho.e rahte hain ab us ki dhun men
jis ko takte na the pahle pahle
ham ko pahchan liya karte the
ye tire shahr ke raste pahle
ab ujalon men bhaTak jaate hain
vo samjhate the andhere pahle
ab na alfaz na ehsas na yaad
itne muflis na hue the pahle
rang ke jaal men aate na kabhi
paas se dekh jo lete pahle
garm hangama-e-kaghaz hai yahan
be-mahak phuul kahan the pahle
Leave a Reply