Aslam Rashid
us ko kar ke salam rang khule
dhire dhire tamam rang khule
ḳhushk honTon pe rakh ke aa.e hansi
kar ke ye intizam rang khule
us ki tasvir ki bala.en liin
kar ke ye ehtimam rang khule
din guzara tha ḳhushk ankhon se
dar pe aa.i jo shaam rang khule
chhin li pahle meri bina.i
puura kar intiqam rang khule
chup the vo zikr ghair ka sun kar
aap ka le ke naam rang khule
Leave a Reply