us ki ankhon men utar jaane ko ji chahta hai
shaam hoti hai to ghar jaane ko ji chahta hai
kisi kam-zarf ko ba-zarf agar kahna paḌe
aise jiine se to mar jaane ko ji chahta hai
ek ik baat men sachcha.i hai us ki lekin
apne va.adon se mukar jaane ko ji chahta hai
qarz TuuTe hue ḳhvabon ka ada ho jaa.e
zaat men apni bikhar jaane ko ji chahta hai
apni palkon pe saja.e hue yadon ke diye
us ki nindon se guzar jaane ko ji chahta hai
ek ujḌe hue viran khanDar men ‘azar’
na-munasib hai magar jaane ko ji chahta hai
Leave a Reply