Siddique Mujibi
use yaqin na aaya miri kahani par
vo naqsh DhunD raha tha guzarte paani par
safine thak ke tah-e-ab ho ga.e saare
hunar khila na havaon ka badbani par
main saḳht-jan tha aisa ki chiḳh bhi na saka
fughan fughan thi jahan marg-e-na-gahani par
main asman ko samajhta raha harif apna
gaya na dhyan kabhi us ki be-karani par
‘mujibi’ chup si ye kyuun lag ga.i zamane ko
kahan ga.e vo jo nazan the ḳhush-bayani par
Leave a Reply