use kab se yahi samjha raha huun
tira hi tha main jab tera raha huun
mujhe fursat daboche ja rahi hai
main apne aap se ukta raha huun
koi bhi rokne vaala nahin hai
ḳhamoshi se guzarta ja raha huun
miri tishna-labi par hansne vaale
guzishta vaqt main dariya raha huun
vo ghalati jo kabhi ki hi nahin hai
usi ghalati pe main pachhta raha huun
miri viran ankhen kah rahi hain
yaqinan muddaton tanha raha huun
zamana kaam apna kar raha hai
main apna kaam karta ja raha huun
Leave a Reply