Use Kab Se Yahi Samjha Raha Hun

use kab se yahī samjhā rahā huuñ

tirā hī thā maiñ jab terā rahā huuñ

mujhe fursat daboche jā rahī hai

maiñ apne aap se uktā rahā huuñ

koī bhī rokne vaalā nahīñ hai

ḳhamoshī se guzartā jā rahā huuñ

mirī tishna-labī par hañsne vaale

guzishta vaqt maiñ dariyā rahā huuñ

vo ġhalatī jo kabhī kī hī nahīñ hai

usī ġhalatī pe maiñ pachhtā rahā huuñ

mirī vīrān āñkheñ kah rahī haiñ

yaqīnan muddatoñ tanhā rahā huuñ

zamāna kaam apnā kar rahā hai

maiñ apnā kaam kartā jā rahā huuñ

Leave a Comment