Aankhon Ke Zawiye Bhi Wahin Par jaDe Rahe

āñkhoñ ke zāviye bhī vahīñ par jaḌe rahe

kuchh dil-fareb log jahāñ par khaḌe rahe

aayā nahīñ ḳhayāl kisī rāhgīr ko

kuñ.eñ meñ saat saal to ham bhī paḌe rahe

vo kar rahe the bāteñ sarāsar ḳhilāf jab

jirge meñ kuchh bhī kahne se ham kyoñ Dare rahe

ham jānte haiñ jhelīñ haiñ tum ne aziyyateñ

kuchh imtihān ham pe bhī aksar kaḌe rahe

hālāñki dhamkiyāñ bhī ‘sahar’ bār-hā milīñ

sachche the so zabān pe apnī aḌe rahe

Leave a Comment