Use Bhula Na Saki Naqsh Itne Gahre The

Salma Shaheen

use bhula na saki naqsh itne gahre the

khayal-o-khvab par mere hazar pahre the

vo khush guman the to jo khvab the sunahre the

vo bad-guman the andhere the aur gahre the

jo aaj hoti koi baat baat ban jaati

use sunane ke imkan bhi sunahre the

samaaton ne kiya raqs mast ho ho kar

sada men us ki hasin biin jaise lahre the

hamare dard ki ye dastan sunta kaun

yahan to jo bhi the munsif vo saare bahre the

chale gae vo sharar bo ke is qabile men

to qatl hone ko ‘shahin’ ham bhi thahre the