Naz Muzaffarabadi
us shahar men rahne ko Thikana bhi nahin tha
vo shahar jise chhoḌ ke jaana bhi nahin tha
us shaḳhs ki rah dekhte rahte the hamesha
jis shaḳhs ko is shahar men aana bhi nahin tha
kuchh zad-e-safar paas na tha duur thi manzil
raste men koi yaar purana bhi nahin tha
sahraon men sab ḳharch hui umr ki punji
sau pusht se majnun ka gharana bhi nahin tha
har shaḳhs ne luuTa mujhe haq apna samajh kar
har chand ki main qaumi ḳhazana bhi nahin tha
phir ham ne tiri yaad ko ta.aviz banaya
jiine ka koi aur bahana bhi nahin tha
Leave a Reply