Zafar Ansari Zafar
us se mera to koi duur ka rishta bhi nahin
aur ye bhi hai ki vo shaḳhs paraya bhi nahin
vo mire gham se ho anjan kuchh aisa bhi nahin
vo mira haal magar puchhne aaya bhi nahin
ghair ko qurb mayassar hai magar ai hamdam
meri ḳhatir to tira duur ka jalva bhi nahin
umr bhar saath nibhane ka karun kya va.ada
zindagi ab to mujhe ḳhud pe bharosa bhi nahin
is qadar mujh ko raha abru-e-gham ka ḳhayal
rona chaha to magar phuuT ke roya bhi nahin
ek teri jo tamanna na rahi ai hamdam
mere dil men to kisi shai ki tamanna bhi nahin
ek vo hain ki unhen aa.i hai aram ki niind
ek main huun ki kabhi chain se soya bhi nahin
baaz aate bhi nahin zulm-o-sitam se apne
dekh paate ho magar mera taḌapna bhi nahin
chhoḌe jaati hai magar ye bhi tujhe yaad rahe
zindagi tere siva ab koi apna bhi nahin
kis tarah phail ga.i bu-e-hina har janib
us ke baare men abhi main ne to socha bhi nahin
mujh ko halat ne behis hi bana kar chhoḌa
mere siine men ye dil hai ki dhaḌakta bhi nahin
bhuul ke saare sitam ham to chale jaate ‘zafar’
par hamen us ne kabhi dil se bulaya bhi nahin
Leave a Reply